文學史毋是作品名單
文學史愛處理作者、作品、讀者、出版、媒介、語言、書寫系統佮社會條件之間ê關係。重大事件發生,是毋是有改變啥物?某一个時段ê特殊現象是毋是佮大代誌ê發生有關係?比較大代誌前後,會使看出「大代誌改變啥貨」。
台語文學,就是「運動ê文學」。規部歷史會使ùi文字書寫、歷史發展佮社會運動三ê角度來看:白話字、漢字、臺灣話文佮漢羅按怎發展;作家、作品佮時代按怎互相影響;台語文學又按怎tī制度邊緣建立家己ê作者、讀者、刊物、出版佮文學場域。
文學史愛處理作者、作品、讀者、出版、媒介、語言、書寫系統佮社會條件之間ê關係。重大事件發生,是毋是有改變啥物?某一个時段ê特殊現象是毋是佮大代誌ê發生有關係?比較大代誌前後,會使看出「大代誌改變啥貨」。
漢字、白話字ê使用者是分散tī無仝社會階層。漢字書寫ê使用者範圍khah闊,白話字使用者集中tī教會。M̄-koh,漢字書寫從來毋捌有真正逐家lóng同意ê使用;白話字書寫ê標準化程度khah kôan。
民間故事佮褒歌是作家文學以前ê敘事、韻律資源;歌仔冊kā歌仔寫做字,建立閱讀佮表演市場;翻譯、詩、小說、散文koh逐步擴張台語會使承擔ê知識、情感佮美學功能。
台語文學ê歷史毋是直線發展。殖民統治、國語政策、戒嚴、出版制度佮教育政策攏會造成斷裂;無仝時代ê作家佮社群,koh透過教會、民間、海外、刊物、社團、教育、翻譯佮創作重新接線。
創作、邏輯、問題化。閱讀台語文本,會使訓練學生看見語言選擇後壁ê權力佮文化意義。
美感、描述、情緒辨識。台語閱讀產生ê氣味感受,是文本美學ê一部份。
聽、講、讀、寫。透過文學文本,kā母語ê四項能力一齊飼大。
雜誌刊物是台語創作發表佮thn̂g湠ê平台;作者、讀者、編輯、評論佮出版制度會做伙決定文學會使按怎累積。
漢文:發音佮台語白話口音無仝;詞彙佮台語一般詞彙使用有精差;漢字tī漢文內底ê排列組合佮台語無sio-siāng。
白話字tòe宗教傳播來到台灣。1865馬雅各來台,1870左右開始白話字教育;1885《台灣府城教會報》創刊。白話字提供無受漢學教育ê人一條直接用台語讀、寫ê路。
白話字書寫ê標準化程度khah kôan,mā形成長期ê小說、散文、詩、翻譯傳統。
早期台語漢字書寫會看著tī劇本、歌仔冊、台日對譯教材。歌仔冊ê漢字通常m̄是讀冊人ê正統漢字,卻是一般人讀、唱、表演台語ê實際工具。
1930年代ê臺灣話文論戰,kā這款本底就存在ê台語漢字書寫推入理論、文學佮標準化ê討論。
海外台語文運動重新處理台語beh án-chóaⁿ記錄ê問題,漢字佮羅馬字開始有系統做伙使用。到《台文通訊》、後來ê刊物佮創作,漢羅濫寫成做現代台語文學上常見ê形式。
漢羅毋是妥協,是白話字佮漢字兩條歷史傳統匯流ê結果。
劉青雲著《羅華改造統一書翰文》,1925年發行。伊用白話字標注漢字tī漢文內底ê發音,koh加上用台語(白話字)註解漢文ê意思。
透過頂面ê例thang知:漢文是一般大眾無熟--ê;大眾會使透過白話字學台語書寫mā會使學漢文發音;大眾會使透過台語解說理解漢文ê使用。
台灣新文學運動ê問題意識,是beh開創會使普及、會使教學、會使承chih新時代理念ê書面語。目標共識:「言文一致:我手寫我口」。
M̄-koh,真正ê問題是:beh按怎做到「言文一致」?若日常講ê是台語,中國白話文真濟所在「能看不能唸」,就會再出現一層語言距離。臺灣話文、白話字佮後來漢羅,lóng是在處理chit个問題。
〈虎姑婆〉、〈邱罔舍〉、〈白賊七〉、〈林道乾〉、〈林投姊〉、〈猴精〉、〈廖添丁〉、〈媽祖婆〉等等,lóng有地方性、表演性佮版本差異。
仝一个故事會有無仝主人公、無仝情節;這款變體正是民間故事ê特性。
褒歌毋是固定文本。內容無固定,愛情、生活感慨、婚姻、勞動攏會使;七字四句佔多數,通常一个韻thàng頭尾。
鄭坤五是第一ê kā褒歌當做文學koh做文學性分析ê人。
歌仔ê內容包含:愛情,親情,時事,歷史,勸世,風俗,儀式,蟲thōa魚鳥,花草樹木……等等,會使講歌仔是台灣文化資料庫。
歌仔冊是書面語──長篇敘事抒情;褒歌因為是口語,臨時mā會使演唱,通常袂是長篇。
| 時期 | 發展 | 重點 |
|---|---|---|
| 清國時期 | 1826左右就有歌仔冊ê記錄出現;歌仔冊代先tī清國南爿時行,綴移民入來台灣。 | 傳入、接受。 |
| 1895–1915 | 佇台流通ê版本多數猶是外來本、翻刻本,主題以中國傳統故事、勸世、才子佳人、歷史演義等為主。 | 台灣本地ê特色猶無啥物影跡。 |
| 1916–1945 | 1916年後黃塗活版所加入市場,大量刊印;1930年代本地作者、出版者佮題材明顯增長。 | 出現日語借詞、台灣地名、台灣物產、地方事件、新時代科技、近代社會議題;歌仔冊快速「台灣化」。 |
| 1946–1970 | 竹林書局是長時段ê主要出版者,翻印、改編、調整腔口佮詞彙。 | 到1970年代,綴電視、新興娛樂、社會轉變、台語禁止,市場沓沓仔蔫去。 |
| 解嚴後 | 新創作者、新書寫佮表演、數位保存、文化遺產。 | 市場縮小,傳承並無斷。 |
台灣歌仔冊一直lóng有受著中國ê影響,發生明顯變化ê時間大約是tī 1930年左右。受中國影響會使分做3个方面:直接來自中國進口;本地出版社翻印中國歌仔冊;採用中國ê傳統故事發展歌仔冊。
1920s尾期–1930s開始變化:中國進口受限制,本地歌仔先家己創作,出版社毋免倚靠翻印;台灣在地故事、新聞等變做歌仔題材;台灣歌仔先mā會kā中國來ê故事「二創」。
台灣創作唸歌手第一人。早期四界走跳賣藥仔,1926年開始灌曲盤;創作、演唱,mā被認為佮內台歌仔戲形成有關係。
寫〈新歌廖添丁〉12集、〈特編三伯英臺歌〉55集,歌仔冊專業、「暢銷作家」。Mā有參與灌曲盤,koh有介入直接ê行銷行為。
資料庫收囥伊ê歌仔冊有44本,年代集中tī 1934–1936。伊gâu用現代生活題材:撞球、自動車、茶園、自由戀愛、婚約自主等等。
楊秀卿kā早期「唱為主」ê傳統式唸歌,改進做唱佮口白lóng有ê「口白歌仔」形態。洪瑞珍、微笑唸歌團、周定邦、大目睭唸歌團、古意唸歌團等,koh發展出教學、團隊、文資佮青年復振ê無仝路線。
The Pilgrim's Progress,John Bunyan著。1853年有厦門話白話字版本,1886–1888《臺灣府城教會報》有連載下本。
白話字tòe宗教傳播來到台灣;宗教相關ê冊是第一批翻譯做台語ê著作。《天路歷程》ê意義,是白話字書面文學ùi宗教實用行向長篇敘事文學ê實踐證明。
1908創刊,讀者主要是tī台灣ê日本警察、法院通譯等基層公務人員。以漢字記錄台語,標注台語片假名佮聲調。
《語苑》翻譯ê特色:在地化、簡單化、口語化。翻譯是為語言教育服務,是殖民者ê統治工具,mā保存台語語料。
台語白話字ê翻譯有幾若款:知影源頭佮翻譯者;知影來源毋知翻譯者;來源無清楚,mā無一定知影翻譯者。無一定完全照原文翻,真濟是改寫、節譯、在地化。
1920左右台灣社會ê波浪,對應台語白話字翻譯文章快速增加:早期傳教士為主ê文化生產,沓沓仔行向台灣本地信徒ê文化生產。
Í-sap寓言逐篇故事lóng無蓋長,koh趣味,意思chiâⁿ好,koh袂siuⁿ深,足適合做語言學習ê教材。《語苑》予日本人學台語漢字;《教會公報》予台灣人學台語白話字。
1895年出世,1916年入日本同志社大學英文系,1921年tī淡水中學校教英文,1925年創辦北部台灣教會公報《芥菜子》。
台灣第一位台語專業譯者。集中翻譯年代:1925–1927。翻譯作品總數超過30篇。翻譯來源語:英語為主,mā有日語。
重要翻譯包括Í-sap寓言、Dickens《A Christmas Carol》、Maupassant〈A Piece of String〉等。1950年koh翻譯Shakespeare《The Merchant of Venice》第四幕第一景做《Venice ê 生理人》。
| 階段 | 代表 | 特性 |
|---|---|---|
| 第一波 | 5%台譯計畫(1996–97)、世界童話360、台文1001譯 | 文本生產、語言宣示;以白話字、漢羅等形式大量翻譯世界文學,mā有日治台灣作品ê語內翻譯。 |
| 個人翻譯 | 曾正義、李魁賢等 | 雙語出版、經典翻譯、個人書寫系統並行。 |
| 第二波 | 2018以後 | 譯者群ùi早期ê運動者,轉變做教育現場教師佮翻譯團隊;出版ùi個人、民間社團,轉變kah有完整行銷通路ê出版社合作。 |
賴和ê台語詩是ùi七字仔詩開始。伊ê試驗是tī詩內底調整字數、韻跤ê變化,抑是加入漢文、中華白話文ê透濫,beh揣出台灣新文學、台語詩ê方向。
〈新樂府〉、〈農民謠〉、〈相思〉、〈冬到新穀收〉、〈呆囝仔──獻給我的小女阿玉〉,顯示伊按怎ùi歌仔韻律行向新詩。
楊華書寫台語詩ê過程,直接進入現代詩,因為伊直接接觸中華白話文新詩。1932〈心弦〉透濫中華白話文,mā模仿日本ê俳句短詩。
不管是啥物款ê路線,賴和佮楊華lóng有佮漢文、中華白話文交纏、透濫;che是反映台灣ê特殊歷史環境。
| 作家 | 位置 | 重點 |
|---|---|---|
| 林宗源 | 戰後開創性ê台語詩人 | 1960s尾期,tī台語文學ê烏暗期開始寫台語詩;1991年創立第一ê台語社團「番薯詩社」。 |
| 陳明仁 | 解嚴了後ê多產作家 | 1985開始台語寫作;詩、小說、散文、劇本並行,《台文BONG報》創辦人之一。 |
| 陳雷 | 海外台語詩人 | 寫作以漢羅濫為主;羅馬字堅持白話字。 |
| 鄭雅怡 | 女性觀點 | 作品以詩上chē,散文第二chē;以女性觀點關懷女性佮台灣。 |
| 呂美親 | 學院、創作 | 台語詩集《落雨彼日》,koh參與台語文運動史料整理。 |
| 溫若喬 | 新語人 | 大學二年chiah開始重頭學台語;翻譯Tagore《漂鳥集》,koh持續寫現代台語詩。 |
有「根」ê現代性:tī台語詩ê發展歷史中,「七字仔」是重要ê根源。白話字台語詩是tī特殊社群內底有標準化,視覺上會使直接「看著」台語音韻ê書寫;漢字台語詩ê書寫者主要是有漢學根底ê台灣智識份子,但是漢字台語詩相對欠缺書寫ê標準。
不管是陳清忠1925年拍破台語七字仔詩ê翻譯詩,抑是溫若喬2023對Tagore詩ê翻譯,lóng是透過翻譯hō͘台語有閣khah濟氣力展現現代性。當代語言斷裂佮新語人加入詩ê寫作,是危機mā是機會。
| 傳統 | 發展 | 重要作品/現象 |
|---|---|---|
| 白話字(POJ) | 教會教育、報刊、翻譯佮小說形成穩定發表園地。 | 〈日本ê怪事〉作為早期小說雛形;胡紹芳〈過年〉、郭頂順〈拯救〉、鄭溪泮《出死線》逐步展現短篇、中篇、長篇敘事。 |
| 漢字台語 | 1930年代臺灣話文運動推動智識份子大量試寫漢字台文。 | 賴和〈一個同志ê批信〉、蔡秋桐等,將殖民社會、農村生活、地方聲口直接放入小說。 |
漢字書寫,台美人經驗。胡民祥長期參與海外台語文學運動,kā台美人生活寫入台語小說。
漢字書寫,政治、人權、威權批判。主要作品猶是華語書寫,m̄-koh解嚴前後進入台語政治小說實驗。
漢羅濫寫,白色恐怖歷史創傷。作品堅持白話字羅馬字,kā歷史創傷、土地佮族群記憶寫入台語敘事。
解嚴後台語小說是長期壓制台語文學以後,台語重新對口語、運動語言,行入現代文學創作ê過程。
台語刊物佮社團tī解嚴以後相連紲ê成立,代表ùi模糊ê「台灣文化」概念行出一條清楚ê路線。1989《風向》《台語文摘》,1991《臺灣教會公報台文天地》《蕃薯詩刊》《台文通訊》,1992《台語風》《台語學生》,後來《海翁台語文學》《台文戰線》等,提供作者穩定發表、讀者閱讀佮評論ê空間。
1998《台語小說精選卷》kā無仝時代、刊物、書寫系統中ê台語小說,整理做一个「小說」這款會使hō͘人辨識ê名。伊毋是單純ê作品集,是文學史上ê命名行動。
25萬字長篇台語小說。第三人稱、地方誌、擬史、檔案想像並用,重構Siraya/平埔記憶,kā主流歷史論述反盤。
二二八、白色恐怖、平埔歷史ê小說集。寫實基底加入魔幻寫實、象徵佮後設技巧;台華對照,自我翻譯ê試驗。故事kā歷史創傷囥轉去高雄具體ê地理佮社會空間。
巴克禮創辦《Tâi-oân-hú-siâⁿ Kàu-hōe-pò》,是台灣第一份報紙,mā是唯一kui-ê用白話字來寫ê報紙。Chit份報紙ê誕生,代表印刷、流通、作者發表、讀者閱讀ê市場已經tī台灣puh穎。
早期文類毋但有宗教消息,koh有新聞、批信、傳記、遊記、科普。
《台灣府城教會報》辦徵文。九ê人投稿,馬偕佮甘為霖評審;入選有廈門佮台灣作者。
劉茂清ê文章討論:學白話字phēng學漢字khah簡單;適合教會ê人、女人、工人、散良人子弟、無受漢學教育ê人、原住民;將來mā應該發展到天文、地理、數學、物理、國際新聞。
聖經翻譯、教會消息、傳道、信仰見證。
批信、日誌、家庭故事、旅遊記錄。
新聞、科學普及、國際消息、醫療衛生。
傳記、抒情、評論、議論散文。
1903年曾持衡〈埔社消息〉記錄埔里烏牛欄ê事件。地方新聞寫法:時間、地點、人物、事件清楚交代;結尾koh有明顯ê宗教倫理評論,所以毋是單純新聞報導。
這款新聞、報導、評論混合ê寫法,顯示台語散文早期就已經會使負擔公共敘事。
《十項管見》是第一本收囥做一本冊ê台語白話字散文集,mā是台灣第一pái有白話ê散文集出版。M̄是日文,mā m̄是漢文。作者:蔡培火。
1954年後《活命ê米糧》《家庭ê朋友》等宗教刊物維持白話字書寫。二十一世紀《海翁台語文學》等長期平台,koh擴大散文、小說、詩、評論等文類ê發表。
散文是結構性ê講話。台語散文書寫ê發展ùi白話字開始。白話字雖然是有宗教目的ê使用,m̄-koh台語散文ê發展自然ùi世俗化ê方向去:宗教論述、宗教記錄、一般論述、地方新聞、科學傳播、文學創作。
1920年代ê台灣智識分子受日本言文一致,mā受中國白話文運動ê影響,認為舊文學無法度「啟蒙民智」,beh開創適合一般人讀ê白話文學。目標共識:「言文一致:我手寫我口」。
黃石輝指出,中國白話文tī台灣「不能了解的地方還不少,而且大多數是能看不能唸的」;郭秋生mā指出台灣有「不用台灣特有的言詞不會說明的事象」。
1932創刊,刊載漢文、台灣白話漢文、中國白話文、臺灣話文四種書寫。郭秋生創設〈臺灣話文嘗試欄〉,賴和發表〈歸家〉〈惹事〉等臺灣話文小說。
臺灣話文是「書面語」,毋是純口語。特殊文體會透濫文言漢文、白話音、訓讀音讀、少量新造字;漢字ê「án-chóaⁿ讀」是核心──多音是資源,mā是障礙。
戰後台語戲劇實驗,hō͘王育德直接拄著「台語beh án-chóaⁿ書寫」ê問題。後來伊流亡日本,研究台灣史、台灣話佮台灣文學。
「咒懺」m̄是神祕ê運命,是殖民佮國家語言政策一再kā文學語言斬斷。
1957王一式、1960s王二式,到1972《台灣語入門》改用白話字。理由:白話字有歷史根源佮使用者基礎,無需要koh發明家己ê台語拼寫法。
1975年台灣語言研究及推廣中心tī紐約成立,發行《台語通訊》;1977年改名台灣語文推廣中心,發行《台灣語文月報》。《台灣語文月報》是頭一份漢羅濫寫ê台語文報紙。
文化(同鄉會)、認同(台語)、政治(建國)相弓。海外台灣人tī公開場合以台語演講,soah無一套穩定ê文字thang記錄;chit个實際問題推動海外台文ê文字工程。
1990年Los Angeles台灣同鄉因學台語電腦佮台文寫作成立「台文習作會」。1991年7月《台文通訊》創刊,1992年tī台灣設聯絡處。
《台文通訊》是運動雜誌,mā是文學雜誌;讀者聯誼會透過做伙讀、做伙寫、做伙發表,kā刊物變做草根網絡。
1996年李江却台語文教基金會成立,《台文BONG報》創刊。強調「文學,專業,活潑」,是《台文通訊》ê延伸:ùi台語ê語言運動到台語ê文學佮文化釘根。
1988成大台語社、1990台大台灣語文社、1991淡江語言文化研究社、1992清大台語社;1992學生台灣語文促進會成立。學生運動補上學校制度ê空白,mā替後來ê台語教學制度累積人才。
台語文學化m̄是「kā台語寫出來」niâ;koh是建立文類、風格、讀者、投稿制度佮審美標準ê事工。詩、散文、小說、劇本逐步形成會使長期累積ê文學生產。
台語文學就是運動ê文學。透過台語運動(組織、社會網路、動員),台語書寫開始khah普遍,台語作家漸漸出頭,台語文學開始成熟。Phēng白話字台語文佮1930年代ê臺灣話文koh khah多元,豐沛,活潑ê現代台語文學總算出世。
現代台語文學是真正筆尾合舌尖ê書面語。雖然現代台語文學chit-má ê勢面上好,台語本身soah已經teh焦蔫。